Phau ntawv Moo Zoo muaj 4 phau, thawj phau yog Mathais, Mathais yog Yesxus ib tug thwjtim. Ua ntej Mathais tsi tau ua Yesxus tug thwjtim nwg yog ib tug tuabneeg sau se rua nom tswv Loo. Phau ob yog Malakaus. Tug Malakaus nuav txawv tug kws yog Yesxus ib tug thwjtim, peb paub tas tug Malakaus nuav yog tug kws hu ua Yauhaa Malakaus nyob rua huv Phau ntawv Cov Tubkhais Tegnum (Acts) has txug. Povlauj hab Banabas ob tug tau sib caav ib zag nyaav heev txug qhov kws coj Malakaus nrug ob tug moog tshaaj txuj Moo Zoo. Banabas xaav coj Malakaus nrug ob tug moog tabsis Povlauj tsi kaam vim muaj ib zag thaum ob tug coj Malakaus moog txug tog tes nwg cale rov qaab moog tsev lawm.  Phau ntxiv moog yog phau ntawv Lukas, Lukas yog ib tug kws khu moob, nwg txiv yog ib tug tuabneeg Kilis. Lukas yog tug kws sau phau ntawv Cov Tubkhai Tegnum hab nwg yog tug kws nrug Povlauj uake moog tshaaj Vaajtswv txuj Moo Zoo rua lwm haiv tuabneeg.  Phau 4 yog phau Yauhaa, tug Yauhaa nuav yog Yesxus ib tug thwjtim kws Yesxus hlub. Yauhaa kuj sau lwm phau ntawv hab xws le yog phau 1, 2, 3 Yauhaas hab phau Qha Tshwm.

    Kuv yuav muab 4 phau Xaa Moo Zoo nuav lug sau ua ib phau xwb. Cov phau Xaa Moo Zoo muaj ntau yaam kws puab has ib yaam tabsis muaj ntau zaaj lug ib phau has txug tabsis lwm phau ho tsi has. Yog le nuav kuv yuav muab 4 phau ntawv nuav sau sib txuas ua ib phau kuas zoo le yog ib zaaj xwb. Qhov kuv ua le nuav yog ua lawv le phau ntawv kws hu ua Harmony of the Gospels. 

Yauhaa 1:1-18

    Thaum chivkeeb Txujlug twb yeej muaj nyob lawm, Txujlug nuav nrug Vaajtswv nyob, qhov tseeb Txujlug nuav yog Vaajtswv ntaag. Nwg twb nrug Vaajtswv nyob thaum chivkeeb lug lawm, lug ntawm nwg lug txhua tsaav txhua yaam txha muaj tshwmsim lug. Yog tsi muaj nwg tes txhua yaam kws tau tsim muaj lug yeej tsi tshwmsim hlo le. Nyob huv nwg muaj txujsa, hab txujsa ntawd yog qhov kaaj rua tuabneeg pum kev. Hab qhov kaaj hov ci moog rua huv qhov raus ntuj, kuas qhov raus ntuj hov laum tsi tau kuas qhov kaaj tsaus.
   

    Muaj ib tug txiv neej Vaajtswv tau xaa nwg lug, nwg muaj lub npe hu ua Yauhaa. Nwg lug ua timkhawv, lug ua povthawj rua qhov kaaj, nwg ua le nuav kuas txhua tug txha lug ntseeg. Nwg tsi yog qhov kaaj, nwg tsuas yog lug ua timkhawv rua qhov kaaj xwb. Qhov kaaj kws tseeb ua tau rua suavdlawg pum kev yeej ib txwm muaj nyob, hab twb lug rua huv nplajteb nuav lawm: Nwg nyob huv nplajteb nuav hab lub nplajteb nuav yog nwg tsim; tabsis lub nplajteb nuav tsi paub nwg. Nwg lug nyob rua huv yaam kws yog nwg le kws nwg twb tsim tau lawm, tabsis nwg tsaav tuabneeg tsi leeg yuav nwg. Tabsis txhua tug kws leeg yuav nwg, nwg pub rua puab muaj feem lug ua Vaajtswv le mivnyuas.  Cov kws ca sab rua nwg lub npe, puab tau yug dlua tshab, tsi yog yug lug muaj tsoj muaj ntshaav losis yug lawv le tuabneeg txuj kev ntshaw ntawm cev nqaj dlaim tawv losis yog lug ntawm txiv neej lug, tabsis yog lug ntawm Vaajtswv lug.
   

    Hab Txujlug nuav lug yug ua tuabneeg hab nrug peb nyob, nwg puv npo kev hlub hab kev tseeb. Hab peb pum nwg lub meejmom ci nraag ab, yog lub meejmom ci nraag ab kws yog lug ntawm Leej Txiv tuab leeg Tub lug.
    Yauhaa ua timkhawv txug nwg hab tau qw tas, "Tug nuav yog tug kws kuv has tas, 'Nwg yog tug kws lawv kuv qaab lug nwg muaj fwjchim luj dlua kuv, rua qhov nwg xub nyob ua ntej kuv lawm.'"
   

    Hab lug ntawm nwg lug peb txhua tug tau txais nwg txuj kev hlub taag los rov txais dlua. Txuj kevcai mas yog Mausxes muab, tabsis txuj kev hlub hab qhov tseeb yog lug ntawm Yesxus Khetos lug. Tsi tau muaj leejtwg pum Vaajtswv le; rua yog Vaajtswv nwg tuableeg Tub txha pum xwb, vim nwg lug ntawm Leej Txiv lug, nwg txhaj le qha Leej Txiv kws yog Vaajtswv rua peb paub.

Lukas 1:5-25

    Lub sijhawm kws fuabtais Hemlauj kaav Yutais tebchaws, muaj ib tug povthawj hlub kws yog paab Anpiyas, kws muaj lub npe hu ua Xakhalias.  Nwg tug quaspuj hu ua Elixanpev, nwg yog Aloos cov ntxhais xeebntxwv.  Ob tug ob leeg puavleej ua neej ncaajnceeg rua Vaajtswv, coj hab ua lub neej lawv nraim le Vaajtswv txuj kevcai hab coj tau txhua yaam kws Vaajtswv yeem tseg lawm txhua nrho, ob tug tsi tau ua ib qhov txhum hlo le. Tabsis ob tug tsi muaj mivnyuas, rua qhov Elixanpev xeeb tsi taug tub hab ob tug los puavleej laug heev lawm hab.

    Lub sijhawm thaum Xakhalias tseem ua tegnum povthawj rua Vaajtswv huv lub tuam tsev, vim yog raug rua puab pawg povthawj lug ua num.  Puab tshu tau ntawv kuas Xakhalias moog ua num rua huv chaav dlawbhuv kws hlawv tshuaj tswqaab rua Vaajtswv, lawv le kws cov povthawj ib txwm ua lug lawm.  Taagnrho tej tuabneeg coobx puab tseem thov Vaajtswv nyob rua huv lub tuam tsev chaav dlawbhuv saab nrau.  Lub sijhawm kws Xakhalias tseem hlawv tshuaj tswqaab, muaj ib tug timtswv txawm lug sawv ntawm lub thaaj hlawv tshuaj tswqaab saab xis rua nwg pum.  Thaum Xakhalias pum dlheev nwg, Xakhailias ib ce tshee nyo hab ntshai kawg le.  Tabsi tug timtswv has rua nwg tas,  "Tsi txhob ntshai, Xakhailias, vim Vaajtswv twb nov meb tej lug thov lawm.  Koj tug quaspuj Elixabev yuav xeeb ib tug tub rua koj, koj yuav tsum tis nwg lub npe hu ua Yauhaa.  Meb yuav tau kev zoo sab hab luag quas ntxis hab muaj coob leej yuav zoo sab heev rua thaum yug nwg lug.  Nwg yuav yog ib tug tseem ceeb heev rua ntawm Vaajtswv.  Nwg yuav tsi haus cawv losis tej yaam dlej kws nrim, nwg yuav puv nkaus Vaajtswv tug Ntsujplig, pib thaum nwg tseem nyob huv nplaab lug moog lawm.  Nwg yuav tig cov Yivxayees tej mivnyuas coob leej rov lug cuag Vaajtswv kws yog cov Yivxayees tug Vaajtswv.  Nwg yuav muaj Eliyas tug ntsujplig hab lub fwjchim nrug nwg moog ua ntej, moog tig cov Yivxayees leejtxiv lub sab rov lug cuag puab cov mivnyuas, tawm ntawm txuj kev tsi noog lug moog rua lub tswvyim kws yog kev ncaaj kev nceeg, nwg lug npaaj kuas txhij ib cov tuabneeg tog tug Tswv."

    Xakhailias has tas, kuv yuav ua le caag txha paub tas tej nuav muaj tseeb? Kuv yog ib tug laug lawm, kuv tug quaspuj los twb laug heev lawm hab."

    Tug timtswv teb has tas, "Kuv yog Khali-ees, tug kws sawv ntawm Vaajtswv lub xubndlag.  Vaajtswv xaa kuv lug nrug koj thaam hab qha tej xwm zoo kws yuav muaj tshwmsim lug rua koj.  Tabsis taamsim nuav koj tsi ntseeg kuv tej lug, yeej yuav muaj tshwm lug raws le lub caij kws twb teem tseg lawm, kuas koj yuav has tsi tau lug moog txug nub kws tej nuav tav."

    Cov tuabneeg kws nyob saab nrau tseem taabtom tog Xakhalia, puab xaav tsi thoob sov yog le caag nwg yuav moog huv chaav tsev dlawbhuv ntev ua luaj le.  Tabsis thaum nwg tawm lug, nwg txawm has tsi tau lug rua puab lawm.  Tom qaab ob peb nub kws Xakhalias ua num taag, nwg txawm rov moog tsev, tom qaab hov Elixabev txawm xeeb nwg tug tub.  Tsib lub hlis, nwg tsi tawm moog rua qhovtwg le, nwg has tas, "Nuav yog yaam kws Vaajtswv ua rua kuv, rua qhov taamsim nuav Vaajtswv saib tuaj rua kuv hab Nwg txaus sab rua kuv, nwg txha muab kuv txuj kev txaaj muag tshem moog kuas kuv txhob tsaug txaaj muag lawm.

TUG TIMTSWV COJ XUV ZOO LUG RUA MAIVLAG

Lukas 1:26-38

    Tsau lub hlis tomqaab hov Vaajtswv xaa tug timtswv Kali-ees lug ntawm Vaajtswv lug moog rua ib lub zog Naxalev, xeev Qhalilais, lug tshwm rua ib tug hluas nkauj xwb kws twb qhab rua ib tug txiv neej lawm.  Tug txiv neej lub npe hu ua Yauxej, nwg yog Vaajntxwv Daviv caajceg; tug ntxhais nuav lub npe hu ua Maivlag.  Tug timtswv lug tshwm rua nwg pum hab has tas, "koj cale tau zoo nyob kaajsab quas lug, koj yog tug kws Vaajtswv txaus sab hab Vaajtswv nrug nraim koj nyob!"

    Tabsis Maivlag nyuaj sab rua cov lug hov heev hab nwg xaav tsi thoob sov tug timtswv hov has txug dlaabtsi.  Tug timtswv has tas, "Koj tsi txhob ntshai, Maivlag." rua qhov koj yog tug kws Vaajtswv txaus sab.  Koj yuav xeeb ib tug mivnyuas tub nyob rua huv plaab, koj yuav tsum tis nwg lub npe hu ua Yesxus.  Nwg yuav muaj fwjchim, hab suavdlawg yuav hu nwg ua Vaajtswv tug kws luj kawg nkaus tug Tub.  Tug Tswv kws yog Vaajtswv yuav muab lub rooj vaajntxwv kws yog Nwg txiv Daviv lub rua nwg: Nwg yuav kaav Yakhauj tsev tuabneeg moog ib txhis, nwg lub tebchaws yuav tsi muaj nub kawg."

    Maivlag has tas, "Yuav ua le caag muaj tau," rua qhov kuv twb tsi tau muaj txiv?"

    Tug timtswv has tas, "Vaajtswv tug ntsujplig yuav lug rua sau koj, hab Vaajtswv tug kws luj kawg nkaus yuav lug nroog koj.  Yog le ntawd, tug kws Dlawbhuv kws yuav yug lug yuav muab nwg hu ua Vaajtswv tug Tub.  Koj sim saib, koj tug puj nyaaj Elixabev twb laugx hab xeeb tsi taug mivnyuas lawm los nwg twb xeeb ib tug tub lug tau tsau lub hlis lawm.  Rua Vaajtswv, yeej tsi muaj ib yaam kws nwg ua tsi tau."

    Maivlag has tas, "kuv tsi pum qaab xaav, kuv yog Vaajtswv ib tug ntxhais qhev xwb, thov kuas muaj lawv le tej lug kws koj has."  Tes tug timtswv txawm ncaim Maivlag moog lawm.

MAIVLAG MOOG SAIB ELIXABEV

Lukas 1:39-56

    Luj sijhawm hov, Maivlag txha sawv kev tseeg maaj nroog moog rua peg lub zog kws nyob huv Yuntais, hab moog rua huv Xakhalias lub tsev hab moog ntsib Elixabev.  Thaum kws Elixabev nov dlheev Maivlag lub suab, tug mivnyuas txawm dlha cuag tsi huv nwg lub plaab, hab nwg txawm puv nkaus Vaajtswv tug Ntsujplig hab quaj has tas, "Vaajtswv foom koob rua koj ntau dlua taagnrho cov quaspuj, hab koj lub plaab los tau koobmoov!  Tabsis kuv twb tsi tsim nyog los kuv tug Tswv leej nam tseem tuaj saib kuv hab?  Thaum kuv nov dlheev koj lub suab hu kuv, kuv tug mivnyuas huv plaab txawm dlha zoo sab kawg le.  Koj tau koobmoov ntau vim koj ntseeg, yog le hov txhua yaam yuav tav moog lawv le Vaajtswv tau has lawm.

    Maivlag has tas, "Kuv tug ntsuj cale txhawb nqaa tug Tswv, hab kuv tug plig ca le zoo sab rua huv Vaajtswv kws yog kuv tug Cawmseej;  yog nwg txaus sab rua kuv kws yog nwg ib tug ntxhais qhev rua lub chaw qeg.  Txij nuav moog, txhua tam tuabneeg yuav hu kuv tas tug tau koobmoov, vim tug kws muaj fwjchim tau pub ntau yaam zoo rua kuv, nwg lub npe yog lub npe kws dlawbhuv.  Nwg txuj kev hlub nyob nrug cov  kws ntshai nwg moog ib tam dhau ib tam.  Nwg qha tas nwg txhais caaj npaab yog zug luj zug nchaav hab faib cov tuabneeg khaavtheeb moog nyob ua saab ua sua.  Nwg txu cov kws muaj fwjchim sau puab lub rooj vaajntxwv lug hab nwg tsaa cov kws qeg lub meejmom kuas sab.

    Hab tug mivnyuas luj hlub hab muaj zug huv saab ntsujplig, hab nwg nyob tom moj saab qhuas moog txug nub kws lug lug tshwm rua cov Yivxayees.  

NUB YUG YESXUS

Lukas 2:1-7

    Lub sijhawm ntawd Vaajntxwv Xixaws Aunkuxatus has kuas cov pejxeem kws nyob thoob plawg txhua lub tebchaws suavdlawg tuaj moog sau npe, zag nuav yog thawj zag kws muaj sau npe, yog lub sijhawm kws Kulini-us ua nom kaav tebchaws Xilias. Txhua tug nyag txawm moog sau npe rua huv nyag lub nroog. Vim Yauxej yog Vaajntxwv Daviv tsevneeg hab yog nwg le caajceg, nwg txha tawm huv lub xeev Qhalilais moog rua nraag lub nroog Naxalev huv Yutais tebchaws, moog rua huv lub nroog Bevlehem kws yog Daviv lub nroog, nrug Maivlag kws taabtom xeeb ib tug mivnyuas kws yog nwg tug quaspuj kws nwg twb qhab lawm.  Thaum kws ob tug tseem nyob huv lub nroog Bevleheem ces txawm txug lub caij kws Maivlag yug tug mivnyuas, kws yog nwg thawjx tug miv tub.  Nwg muab khaubdluag qhwv tug mivtub hab muab nwg tso pw rua huv lub dlaab zaub nyuj.  Rua qhov tsi muaj chaw huv tsev su rua ob tug su.

ZAAJ KWS HAS TXUG COV TUB YUG YAAJ

Lukas 2:8-20

    Nyob thaaj tsaam ntawd muaj ib co tub yug yaaj tseem yug yaaj nyob tom tshaav, hab saib puab cov yaaj mo ntuj.  Taamsim hov, txawm muaj ib tug timtswv tshwm lug rua puab pum, hab tug Tswv lub fwjchim ci nraag ab ci puagncig puab, ua rua puab ntshai kawg le hab nwg has rua puab tas,

    "Mej tsi txhob ntshai; mej sim saib, kuv coj txuj xuv zoo hab kev zoo sab kawg nkaus lug rua txhua tug tuabneeg.  Yog nub nua nyob rua huv Daviv lub nroog tug Cawmseej twb yug lug lawm, nwg yog tug Tswv kws yog Khetos (tug tsaug pleev, tsaug tsaa). Nuav yog lub cim qha rua mej: mej yuav pum ib tug mivnyuas mog qhwv khaubdluag pu rua huv ib lub dlaab zaub."

    Hab taamsim hov ces txawm muaj ib paab timtswv ceebtsheej coobx  lug qhuas Vaajtswv hab has tas, "Txawb nqaa Vaajtswv tug kws ci nraag ab kws sab kawg nkaus hab kuas tej tuabneeg huv nplajteb tau nyob kaaj sab quas lug."  Tom qaab hov kws cov timtswv ncaim puab moog rua sau ntuj lawm, cov tub yug yaaj ib leeg has rua ib leeg tas, peb cale moog rua huv lub nroog Bevleheem hab moog saib yaam kws tau muaj tshwmsim lug lawm kws tug Tswv twb qha rua peb paub lawm."  Puab txawm ceev nrooj moog hab moog pum Maivlag hab Yauxej, hab pum tug mivtub pw rua huv lub dlaab nyuj.  Thaum puab pum lawm, puab txawm qha txhua yaam rua ob tug lawv le tej lug kws tug timtswv tau qha rua puab txug tug mivnyuas.  Txhua tug kws nov xaav tsi thoob txug tej kws cov tub yug yaaj tau has hov.  Tabsis Maivlag khaws txhua yaam nuav hab, tso tuab ywm rua huv nwg lub sab.  Ces cov tub yug yaaj txawm rov qaab moog, puab qhuas Vaajtswv hab txhawb nqaa nwg vim puab tau pum hab tau nov txhua yaam, muaj tseeb lawv le kws tau has rua puab lawm.  

   FIJ YESXUS RUA VAAJTSWV HUV LUB TUAM TSEV

Lukas 2:21-39

    Tom qaab kws puv yim nub lawm, puab txawm muab tug mivnyuas ua kevcai txav hab muab tis npe hu ua Yesxus lawv le kws tug timtswv tau has tseg ua ntej kws tsi tau xeeb rua huv plaab. Thaum txug lub sijhawm lawm, Yauxej hab Maivlag ob tug txawm moog ua kevcai ntxuav lawv le Mausxes kevcai, ob tug coj Yesxus moog rua nraag lub nroog Yeslusxalees hab muab nwg fij rua tug Tswv lawv le txuj kevcai has tas, txhua tug tub kws xubx lug xeeb rua huv nam plaab yuav tsum hu tas dlawb huv rua tug Tswv hab muab khoom fij rua tug Tswv, xws le, ob tug nquab taug losis nquab nyeg moog fij, txha lawv le twb muaj lug sau tseg rua huv tug Tswv txuj kevcai lawm.

    Thaum hov muaj ib tug txiv neej nyob huv lub nroog Yeslusxalees, muaj lub npe hu ua Xime-oos, nwg yog ib tug ncaajnceeg hab fwm Vaajtswv, hab nwg naj nub tog lub sijhawm kws Vaajtswv yuav lug cawm nwg haiv tuabneeg Isxayees.  Vaajtswv tug Ntsujplig kws dlawbhuv nrug nraim nwg nyob, hab qha rua nwg has tas nwg yuav tsi tuag moog txug thaum kws nwg xub pum tug Tswv kws yog tug Camseej ua ntej.  Vaaj Ntsujplig txawm coj nwg tuaj rua huv lub tuam tsev.  Thaum lub sijhawm kws Maivlag hab Yausxej coj tug mivnyuas kws yog Yesxus moog ua lawv le txuj kevcai kws puab ib txwm ua, nwg muab Yesxus puag rua ntawm npaab hab has le nuav tas,  "Tug Tswv, ca kuv kws yog koj tug tubqhe ncaim moog kaaj sab quas lug, vim nwgnuav koj twb ca kuv pum koj txuj kev cawm dlim kws koj twb npaaj rua txhua tug tuabneeg lawm, Nwg yog lub teeb kws ci moog rua lwm haiv tuabneeg, hab ua kuas koj haiv tuabneeg Isxayees tau koobmeej. 

    Yesxus nam hab txiv xaav tsi thoob rua txhua yaam kws has txug nwg.  Xime-oos foom koobmoov rua puab hab has rua Maivlag kws yog Yesxus nam has tas, "Vaajtswv xaiv tug mivtub nuav lug ua rua ntau leej Isxayees ntau leej qaug hab ntau leej sawv,  hab yuav muaj ntau leej tawm tsaam nwg hab nwg yuav nthuav coob leej tej kev xaav hab tej kws puab lub sab xaav ua rua suavdlawg paub, hab raab ntaaj los yuav chob koj tug ntsujplig hab.

    Hab txawm muaj dlua ib tug quaspuj kws hu ua Ana, nwg yog ib tug kws cev Vaajtswv lug.  Nwg yog Fanu-ees kws yog Avshawm caajceg tug ntxhais.  Nwg twb laug heev lawm, nwg nrug nwg tug txiv nyob tau xyaa xyoo xwb, tes nwg txawm ua puj ntsuag lug txug thaum nwg noob nyoog muaj yim caum plaub xyoos.  Nwg nyob huv lub tuam tsev taag moog le xwb, nwg hawm Vaajtswv lug ntawm txuj kev yoo mov hab thov Vaajtswv ntsuab nub hab mo ntuj.  Nwg txawm tuaj ncaaj thaum ntawd, nwg ua Vaajtswv tsaug, hab nwg has txug tug mivtub nuav rua txhua tug kws nrhav txuj kev cawm dlim rua lub nroog Yesluxalees.

    Tom qaab kws Yausxej hab Maivlag ob tug ua txhua yaam tav taag lawv le txhua yaam lawv le tug Tswv txuj kevcai lawm, puab rov qaab moog rua nraag Bevlesheem.

COV TUB TXAWG TUB NTSE TUAJ SAIB YESXUS

Mathais 2:1-12

    Lub sijhawm tomqaab kws Yesxus yug lug rua huv Bevlesheem Yutais tebchaws thawm kws yog Helauj ua Vaajntxwv, muaj ib paab tubtxawg tubntse tuaj saab nub tuajx rua huv Yeluxalees, puab has tas, "Tug kws yug lug ua cov Isxayees tug Vaajntxwv nyob rua qhov twg? Peb pum nwg lub nubqub tawm nyob rua saab nubtuaj es peb txha le tuaj pehawm nwg."

    Thaum Helauj nov le nuav, taamsim ntawd nwg hab txhua leej kws nyob huv Yeluxalees nyuaj sab heev.  Nwg txha le hu taag nrho cov coj ntawm cov povthawj hab cov xibfwb kws txawj qha Vaajtswv txuj kevcai tuaj uake, hab nug puab tas tug Cawmseej tau yug lug rua qhov twg.

    Puab teb tas, "huv Bevleheem Yutais tebchaws," rua qhov tug xibfwb cev Vaajtswv sau tseg le nuav has tas, lub nroog Bevleheem, huv lub tebchaws kws cov Yutais nyob, koj tsi yog  kws miv dlua tej nroog huv Yutais tebchaws, vim tawm huv koj lug yuav muaj ib tug thawjcoj tshwm lug coj cov kuv haiv tuabneeg Isxayees le tug tswv kws saib nwg cov yaaj.

    Dlhau hov, Hemlauj txawm coj cov tub txawg tubntse hov moog rua ib qho kws tsi muaj tuabneeg hab nug puab saib thaum twg lub nubqub tau tshwm lug lawm.  Tes nwg txawm xaa puab moog rua Bevleheem hab has rua puab tas, "mej moog ua tuab zoo nrhav kuas tau tug mivnyuas, thaum mej nrhav tau lawm tes xaa xuv rua kuv es kuv yuav tuaj moog pehawm nwg ib yaam nkaus hab." 

    Tomqaab kws puab nov Vaajntxwv has le hov taag, puab txawm moog lawm, thaum puab moog na ua caag puab txawm rov pum lub nubqub kws tuaj saab nub tuajx dlua hab moog ua ntej puab moog ntseg ncaaj ntawm qhov chaw kws tug mivnyuas nyob.  Thaum puab pum lub nubqub mas puab zoo sab heev kawg nkaus le.  Puab txawm moog rua huv tsev, puab pum tug mivnyuas hab Maivlag kws yog leej nam, puab txhu caug pehawm nwg.  Puab txawm qheb puab tej thawv hab tshu puab tej khoomplig kws yog kub, tej tshuaj tsw qaab hab tej roj tsw qaab mules lug pub rua tug mivtub.  Mo ntawd, Vaajtswv txawm lug ua npau suav rua puab kuas txhob moog cuag Hemlauj, tes puab txawm moog dlua lwm txuj kev rov moog rua puab lub tebchaws lawm. 

TSIV MOOG RUA TEBCHAWS IJIV (INTSIV)

Mathais 2:13-15

    Tomqaab cov tubtxawg tubntse ncaim moog lawm, taamsim ntawd, muaj ib tug timtswv lug ntawm Vaajtswv lug tshwmsim hab ua npausuav rua Yausxej has tas, "Cale sawv, coj tug mivnyuas mog hab nwg nam tsiv moog rua tebchaws Ijiv hab nyob moog txug thaum kuv qha rua koj; ruaqhov Helauj yuav nrhav tug mivnyuas muab tua povtseg."

Yausxej txawm sawv lug hab coj tug mivnyuas hab nwg leej nam mo ntuj hab ncaim moog rua tebchaws Ijiv, puab moog nyob txug thaum kws Helauj tuag, nuav yog muaj lawv le Vaajtswv cov lug kws tau has tseg rua tug xibfwb kws cev Vaajtswv lug has tas, kuv hu kuv tug tub tawm huv Ijiv tebchaws lug.

COV MIVNYUAS HUV BEVLEHEEM RAUG TUA

Mathais 2:16-18

Tomqaab ntawd, Helauj paub tas cov tubtxawg tubntse ua saib tsi taug nwg lawm, nwg npautawg heev.  Nwg txawm xaa tubrog moog hab tua cov mivnyuas kws muaj 2 xyoos rov huv huv lub Bevleheem hab cov zej zog kws nyob puagncig lawv le lub caij kws cov tubtxawg tubntse tau qha rua nwg lawm.  Nuav yog muaj lawv le cov lug kws tug xibfwb Yelemis tug kws ua xibfwb cev Vaajtswv lug tau has tseg.

Lub suab quaj kws nov huv lub zog Lamas, tau quaj nyav heev - ib yaam le Laxees quaj rua nwg cov mivnyuas; tsi muaj leejtwg ntxag tau kuas nwg lub sab tug rua qhov cov mivnyuas tuag taag lawm.